रायपूर पोलिसांचा गुन्हेगारी प्रवृत्तीच्या व्यक्तींवर कारवाईचा बडगा.,..
हद्दपारीच्या प्रस्तावांची प्रक्रिया सुरू; सार्वजनिक उत्सवातील उपद्रवींवरही प्रतिबंधात्मक कारवाई
अवैध धंदे करणाऱ्यांची गय केली जाणार नाही!
बातमी सम्राट | उज्वल जैस्वाल | बुलढाणा जिल्हा प्रतिनिधी |
रायपूर पोलीस स्टेशनच्या हद्दीत वारंवार गुन्हेगारी कृत्यांमध्ये सहभागी होणाऱ्या तसेच सार्वजनिक शांतता व कायदा-सुव्यवस्थेला बाधा निर्माण करणाऱ्या व्यक्तींविरुद्ध पोलिसांनी कारवाईचा बडगा उगारला आहे. ठाणेदार निलेश सोळंके यांच्या नेतृत्वाखाली गुन्हेगारी पार्श्वभूमी असलेल्या व्यक्तींची माहिती संकलित करून पात्र प्रकरणांमध्ये हद्दपारीचे प्रस्ताव तयार करण्याची प्रक्रिया सुरू करण्यात आली आहे.
रायपूर पोलीस हद्दीत गुन्हेगारीला आळा घालण्यासाठी पोलिसांकडून संशयित व गुन्हेगारी प्रवृत्तीच्या व्यक्तींच्या हालचालींवर करडी नजर ठेवण्यात येत आहे. वारंवार गुन्ह्यांमध्ये सहभागी असलेल्या व्यक्तींविरुद्ध उपलब्ध कायदेशीर तरतुदींनुसार प्रतिबंधात्मक कारवाई करण्यात येणार आहे.
अवैध धंदे करणाऱ्यांवर विशेष लक्ष
अवैध दारू विक्री, जुगार, मटका तसेच इतर बेकायदेशीर धंद्यांमुळे परिसरातील कायदा-सुव्यवस्थेला धोका निर्माण होऊ नये, यासाठी पोलिसांनी अशा कारवायांवर विशेष लक्ष केंद्रित केले आहे. अवैध धंदे करणाऱ्यांची कोणत्याही परिस्थितीत गय केली जाणार नाही, तसेच अशा प्रकारांना प्रोत्साहन देणाऱ्या किंवा त्यामध्ये सहभागी असलेल्या व्यक्तींविरुद्ध कायद्यानुसार कठोर कारवाई केली जाईल, असा इशारा पोलिसांनी दिला आहे.
सार्वजनिक उत्सवांच्या पार्श्वभूमीवर विशेष खबरदारी
गणपती उत्सव, नवरात्रोत्सव तसेच अन्य सार्वजनिक उत्सवांच्या पार्श्वभूमीवर रायपूर पोलिसांनी विशेष खबरदारी घेतली आहे. उत्सवादरम्यान सार्वजनिक शांतता भंग करण्याची किंवा उपद्रव निर्माण करण्याची शक्यता असलेल्या व्यक्तींची माहिती संकलित करण्यात येत असून, आवश्यकतेनुसार त्यांच्याविरुद्ध प्रतिबंधात्मक कारवाईचे प्रस्ताव तयार केले जात आहेत.
गुन्हेगारी कारवायांवर पोलिसांची करडी नजर
वारंवार गुन्हे करणाऱ्या व्यक्ती, सार्वजनिक ठिकाणी दहशत निर्माण करणारे, शांतता भंग करणारे तसेच कायदा-सुव्यवस्थेला बाधा आणणाऱ्या व्यक्तींवर पोलिसांचे विशेष लक्ष आहे. त्यांच्या हालचालींची माहिती संकलित करून परिस्थितीनुसार प्रतिबंधात्मक व कायदेशीर कारवाई करण्यात येणार आहे.
“नागरिकांची सुरक्षितता आणि कायदा-सुव्यवस्था अबाधित ठेवणे हे पोलिसांचे प्रमुख कर्तव्य आहे. वारंवार गुन्हेगारी कृत्यांमध्ये सहभागी असलेल्या व्यक्तींविरुद्ध कायद्यानुसार आवश्यक ती कठोर प्रतिबंधात्मक कारवाई करण्यात येईल. तसेच अवैध धंदे करणाऱ्यांची कोणत्याही परिस्थितीत गय केली जाणार नाही. सार्वजनिक उत्सव शांततेत पार पडण्यासाठीही पोलिसांकडून आवश्यक ती खबरदारी घेतली जात आहे,” अशी माहिती ठाणेदार निलेश सोळंके यांनी दिली.
रायपूर पोलिसांच्या या मोहिमेमुळे गुन्हेगारी प्रवृत्तीच्या व्यक्तींवर नियंत्रण ठेवण्यास मदत होणार असून, गुन्हेगारी व अवैध धंद्यांना आळा घालण्यासाठी प्रतिबंधात्मक कारवाई यापुढेही सातत्याने सुरू राहणार असल्याचे पोलिसांनी स्पष्ट केले आहे.
