अशोक गायकवाड सर यांचा शैक्षणिक साहित्य विज्ञान प्रदर्शनात तालुकास्तरावर प्रथम क्रमांक…
जिल्हा परिषद हायस्कूल, लोहगावच्या शिरपेचात आणखी एक मानाचा तुरा; इंग्रजी भाषा वाचन साहित्याची जिल्हास्तरीय प्रदर्शनासाठी निवड.
मारोती एडकेवार | जिल्हा प्रतिनिधी नांदेड | ११/१०/२०२६/
नांदेड :भाषा विषयाचे शिक्षक असूनही विज्ञान प्रदर्शनात आपल्या शैक्षणिक प्रयोगशीलतेची छाप उमटवत जिल्हा परिषद हायस्कूल, लोहगाव येथील पदवीधर शिक्षक अशोक सायबू गायकवाड यांनी उल्लेखनीय यश संपादन केले आहे. कार्ला फाटा (ता. बिलोली) येथील सनशाइन इंग्लिश मीडियम स्कूलमध्ये आयोजित ५४ व्या तालुकास्तरीय विज्ञान प्रदर्शन व शैक्षणिक साहित्य प्रदर्शनात त्यांच्या इंग्रजी भाषा वाचन साहित्याला प्राथमिक शिक्षक गटातून तालुकास्तरावर प्रथम क्रमांक मिळाला. त्यांच्या साहित्याची जिल्हास्तरीय प्रदर्शनासाठी निवड झाली असून, यामुळे शाळेच्या शैक्षणिक यशात आणखी एका मानाच्या तुऱ्याची भर पडली आहे.
या प्रदर्शनात प्राथमिक व माध्यमिक विद्यार्थी तसेच प्राथमिक व माध्यमिक शिक्षक अशा चार गटांतून एकूण ४२ विज्ञान प्रयोग व शैक्षणिक साहित्य मांडण्यात आले होते. शिक्षक गटातून प्राथमिक व माध्यमिक विभागांतील मिळून आठ शैक्षणिक साहित्यांचे सादरीकरण करण्यात आले. यामध्ये गायकवाड यांनी इंग्रजी भाषा वाचनासाठी उपयुक्त अध्यापन साहित्य सादर केले. विद्यार्थ्यांना इंग्रजी भाषेचे वाचन सहज, सोप्या आणि प्रभावी पद्धतीने करता यावे, वाचनाची गोडी निर्माण व्हावी आणि भाषिक कौशल्यांचा विकास व्हावा, या उद्देशाने तयार केलेल्या त्यांच्या साहित्याला प्राथमिक शिक्षक गटातून प्रथम क्रमांक मिळाला.
अशोक गायकवाड हे जिल्हा परिषद हायस्कूल, लोहगाव येथे भाषा विषयाचे पदवीधर शिक्षक म्हणून कार्यरत आहेत. इंग्रजी विषयाचे उत्कृष्ट शिक्षक म्हणून ते शैक्षणिक क्षेत्रात सुपरिचित आहेत. विद्यार्थ्यांना इंग्रजी भाषा सहज समजावी आणि त्यांचे वाचन कौशल्य विकसित व्हावे, यासाठी ते सातत्याने प्रयत्नशील असतात. पाठ्यपुस्तकातील ज्ञान अधिक सोप्या आणि कृतीशील पद्धतीने विद्यार्थ्यांपर्यंत पोहोचविणे, हे त्यांच्या अध्यापनाचे वैशिष्ट्य आहे.
जिल्हा आणि राज्यस्तरावर अनेक वर्षांपासून उत्कृष्ट साधन व्यक्ती म्हणूनही ते कार्यरत आहेत. शिक्षकांच्या शैक्षणिक विकासासाठी आणि अध्यापन अधिक परिणामकारक करण्यासाठी त्यांनी योगदान दिले आहे. विषयाचा सखोल अभ्यास, नावीन्यपूर्ण प्रयोग आणि सातत्याने शिकत राहण्याची वृत्ती यामुळे त्यांनी आपली वेगळी ओळख निर्माण केली आहे.
भाषा विषयाचे शिक्षक असूनही विज्ञान प्रदर्शनात शैक्षणिक साहित्याच्या माध्यमातून प्रथम क्रमांक मिळवणे ही त्यांच्या बहुआयामी शैक्षणिक दृष्टिकोनाची साक्ष आहे. विद्यार्थ्यांच्या गरजा ओळखून अध्यापन अधिक सोपे, रंजक आणि परिणामकारक करण्यासाठी त्यांनी केलेला प्रयत्न या यशातून अधोरेखित होतो. शिक्षकाने आपल्या विषयाच्या चौकटीबाहेर जाऊनही नावीन्यपूर्ण प्रयोग करता येतात, हे गायकवाड यांनी दाखवून दिले आहे.
शैक्षणिक कार्याबरोबरच गायकवाड यांना संगीताची विशेष आवड असून ते बासरीवादनातही निपुण आहेत. सेवानिवृत्तीला अवघी दोन वर्षे शिल्लक असतानाही त्यांच्यातील शिकण्याची वृत्ती, नवनिर्मितीची ऊर्मी आणि कलेची आवड कायम आहे. अध्यापनासोबतच आपल्या कलागुणांची जोपासना करणारे त्यांचे व्यक्तिमत्त्व प्रेरणादायी आहे.
१९९४ मध्ये खंबाळा येथील शाळेत कार्यरत असताना त्यांनी विद्यार्थ्यांना सोबत घेऊन राज्यस्तरीय विज्ञान प्रदर्शनात सहभाग नोंदवला होता. आता अनेक वर्षांच्या शैक्षणिक अनुभवातून विकसित केलेल्या इंग्रजी भाषा वाचन साहित्याला तालुकास्तरावर प्रथम क्रमांक मिळवून त्यांनी पुन्हा एकदा आपली गुणवत्ता सिद्ध केली आहे.
गायकवाड यांच्या या यशामुळे जिल्हा परिषद हायस्कूल, लोहगावच्या शैक्षणिक यशात आणखी एका मानाच्या तुऱ्याची भर पडली आहे. त्यांच्या यशाबद्दल शाळेचे मुख्याध्यापक, शिक्षकवृंद, शिक्षणप्रेमी नागरिक, गावकरी, केंद्रप्रमुख कार्तिक उत्तरवार, केंद्रीय मुख्याध्यापक गणेश कल्याणी, शिक्षण विस्तार अधिकारी जयवंतराव काळे व तसेच गटशिक्षणाधिकारी बालाजी पाटील इत्यादींच्या वतीने अभिनंदन होत असून, जिल्हास्तरीय प्रदर्शनासाठी शुभेच्छा दिल्या जात आहेत.
