महावितरणच्या अधिकाऱ्यांना ३ कि.मी.विद्युत दुरुस्तीस पायी नेले ; तासाभरात पुस्कोटी गाव उजळले
भारतीय कम्युनिस्ट पार्टीच्या जनसंघर्षाला लाल सलाम..!
जिल्हा प्रतिनिधी गडचिरोली : चुन्नीलाल मोटघरे
एटापल्ली : एटापल्ली तालुक्यातील ग्रामपंचायत वांगेतुरी अंतर्गत पुस्कोटी गावात गेल्या अंदाजे एक महिन्यापासून बंद असलेला वीजपुरवठा अखेर सुरू झाला असून, भारतीय कम्युनिस्ट पार्टीच्या पाठपुराव्याला यश आले आहे. पुस्कोटी गावातील नागरिकांनी वीजपुरवठा बंद असल्यामुळे होत असलेल्या गंभीर अडचणींबाबत भाकपा चे जिल्हा सहसचिव कॉ. सचिन मोतकुरवार यांच्याकडे मदतीची मागणी केली होती. नागरिकांच्या या मागणीची दखल घेत कॉ. सचिन मोतकुरवार यांच्या नेतृत्वाखाली हा प्रश्न महावितरणसमोर मांडण्यात आला.
पुस्कोटी हे गाव एटापल्ली पासून सुमारे ६० किलोमीटर अंतरावर असलेले दुर्गम गाव आहे. गावाच्या शेवटच्या टप्प्यापर्यंत वाहन जाण्यासाठी रस्ता नसल्यामुळे सुमारे ३ किलोमीटर अंतर पायी चालत जावे लागते. अशा परिस्थितीत गेल्या महिनाभरापासून गावातील वीजपुरवठा बंद असल्याने नागरिकांचे जीवन मोठ्या अडचणीत आले होते.
वीज नसल्यामुळे पाणीपुरवठा, मोबाईल चार्जिंग व संपर्क व्यवस्था, विद्यार्थ्यांचा अभ्यास, घरगुती कामे आणि नागरिकांच्या दैनंदिन जीवनावर मोठा परिणाम झाला होता. दुर्गम भागातील नागरिकांना वीजपुरवठ्यासारख्या मूलभूत सुविधेसाठीही दीर्घकाळ प्रतीक्षा करावी लागत असल्याने ग्रामस्थांमध्ये नाराजी होती.
भाकपा ने हा प्रश्न केवळ कार्यालयीन पातळीवर न ठेवता प्रत्यक्ष घटनास्थळी जाऊन परिस्थिती पाहण्याचा निर्णय घेतला. “कार्यालयातील थंड आणि आरामदायी जागेत बसून कागदोपत्री माहिती घेतल्याने दुर्गम भागातील जनतेचे खरे दुःख आणि अडचणी पूर्णपणे लक्षात येत नाहीत. नागरिकांच्या समस्या समजून घेण्यासाठी अधिकारी प्रत्यक्ष गावात गेले पाहिजेत,” अशी भूमिका भाकपा ने मांडली.
यानंतर कॉ. सचिन मोतकुरवार यांच्या नेतृत्वाखाली महावितरणचे उपकार्यकारी अभियंता, उपविभाग एटापल्ली यांना पुस्कोटी गावात प्रत्यक्ष नेण्यात आले. एटापल्लीपासून सुमारे ६० किलोमीटरचा प्रवास केल्यानंतर वाहन जिथपर्यंत जाऊ शकते तिथून पुढे रस्ता नसल्यामुळे उपकार्यकारी अभियंता, उपविभाग एटापल्ली, कनिष्ठ अभियंता एटापल्ली तसेच त्यांची तांत्रिक टीम आणि भाकपा कार्यकर्त्यांनी सुमारे ३ किलोमीटर पायी चालत गाव गाठले.
या प्रत्यक्ष पाहणीवेळी कॉ. सुरज जककुलवार, जिल्हा सदस्य, इतर भाकपा कार्यकर्ते तसेच पुस्कोटी गावातील नागरिक उपस्थित होते. गावात पोहोचल्यानंतर महावितरणच्या अधिकाऱ्यांनी गावातील विद्युत यंत्रणेची प्रत्यक्ष पाहणी केली. वीजपुरवठा खंडित होण्याचे कारण समजून घेतले तसेच ग्रामस्थांशी संवाद साधून गेल्या महिनाभरापासून वीज नसल्यामुळे त्यांना भेडसावणाऱ्या समस्यांची माहिती घेतली.अंधारात गावातील घरांमध्ये पुन्हा दिवे लागल्याने ग्रामस्थांना मोठा दिलासा मिळाला.
भाकपा चे जिल्हा सहसचिव कॉ. सचिन मोतकुरवार म्हणाले, “पुस्कोटी गावातील नागरिकांनी आमच्याकडे मदतीची मागणी केली होती. त्यांचा प्रश्न गंभीर असल्याने आम्ही तो गांभीर्याने घेतला. केवळ कार्यालयात बसून या दुर्गम भागातील नागरिकांचे दुःख समजणे शक्य नाही. म्हणून महावितरणच्या अधिकाऱ्यांना प्रत्यक्ष गावात घेऊन जाण्याचा निर्णय घेतला. वाहन जिथपर्यंत जाऊ शकते तिथून पुढे उपकार्यकारी अभियंता, कनिष्ठ अभियंता आणि त्यांच्या टीमनेही आमच्यासोबत ३ किलोमीटर पायी चालत गाव गाठले. ग्रामस्थांसमोर अधिकाऱ्यांनी प्रत्यक्ष परिस्थिती पाहिली. त्यानंतर अवघ्या एका तासात वीजपुरवठा सुरू झाला. हा भाकपा चा वैयक्तिक विजय नसून पुस्कोटीच्या नागरिकांनी मदतीसाठी केलेल्या मागणीचा आणि त्यांच्या संघर्षाचा विजय आहे.
पुस्कोटीच्या नागरिकांनी मदतीसाठी कॉ. सचिन मोतकुरवार यांच्याकडे आवाज उठवला, भाकपा ने त्या प्रश्नाचे नेतृत्व स्वीकारले, महावितरणचे उपकार्यकारी अभियंता, कनिष्ठ अभियंता आणि त्यांची टीम यांना ३ किलोमीटर पायी दुर्गम गावात नेऊन प्रत्यक्ष परिस्थिती दाखवली आणि त्यानंतर अवघ्या एका तासात वीजपुरवठा सुरू झाला. त्यामुळे हा पुस्कोटीच्या जनतेच्या संघटित संघर्षाचा आणि भाकपा च्या जनहिताच्या पाठपुराव्याचा विजय आहे .
