मिरी परिसरात दुष्काळ जाहीर करण्याची मागणी
शासकीय सर्व योजना शेतकऱ्यांच्या बांधापर्यंत पोहोचवाव्यात : राजूमामा तागड
प्रतिनिधी : प्रमोद डफळ
मिरी : दि. ३० ऑगस्ट २०२६, परिसरात पावसाचे प्रमाण कमी झाल्याने शेतकरी मोठ्या आर्थिक संकटात सापडला आहे. पिकांचे नुकसान, पाण्याची टंचाई आणि वाढता उत्पादन खर्च यामुळे शेतकऱ्यांसमोर गंभीर परिस्थिती निर्माण झाली आहे. त्यामुळे शासनाने मिरी परिसरात तातडीने दुष्काळसदृश परिस्थितीची पाहणी करून दुष्काळ जाहीर करावा, अशी मागणी राजूमामा तागड यांनी केली आहे.
शेतकऱ्यांना सध्या आर्थिक मदतीची नितांत गरज असून शासनाच्या विविध योजना, अनुदाने, पीकविमा, नुकसानभरपाई तसेच इतर मदतीचा लाभ प्रत्यक्ष शेतकऱ्यांच्या बांधापर्यंत पोहोचणे आवश्यक आहे. अनेक शेतकरी योजनांची माहिती व प्रक्रियेमुळे लाभापासून वंचित राहत असल्याने प्रशासनाने विशेष मोहीम राबवून पात्र शेतकऱ्यांना तातडीने मदत उपलब्ध करून द्यावी, अशी मागणीही करण्यात आली.
“शेतकरी सध्या अत्यंत संकटात आहे. शासनाने परिस्थितीची गांभीर्याने दखल घेऊन तातडीने उपाययोजना कराव्यात. केवळ कागदोपत्री योजना न राबवता त्यांचा प्रत्यक्ष लाभ शेतकऱ्यांच्या बांधापर्यंत पोहोचवावा,” असे राजूमामा तागड यांनी सांगितले.
दुष्काळी परिस्थितीचा आढावा घेऊन शेतकऱ्यांना तातडीने मदत न मिळाल्यास त्यांचे आर्थिक संकट आणखी गंभीर होण्याची शक्यता आहे. त्यामुळे शासन व प्रशासनाने त्वरित कार्यवाही करावी, अशी मागणी शेतकरी वर्गातून होत आहे.
