महान धरणातील पाणीसाठा २० टक्क्यांवर; मुर्तिजापूर, बार्शिटाकळी तालुक्यासाठी पर्यायी पाणीस्रोतांचा शोध..
(आमदार हरीषभाऊ पिंपळे यांनी प्रशासनासोबत घेतली तातडीची आढावा बैठक)
मिलिंद इंगळे / अकोला प्रतिनिधी
मुर्तिजापूर : महान धरणातील उपलब्ध पाणीसाठा सध्या अत्यल्प झाल्याने आगामी काळात मुर्तिजापूर तालुक्यासह बार्शिटाकळी तालुक्यात पाणीटंचाईचे संभाव्य संकट निर्माण होऊ शकते. या पार्श्वभूमीवर नागरिकांना भविष्यात पाण्यासाठी मोठ्या अडचणींचा सामना करावा लागू नये, यासाठी आमदार हरीषभाऊ पिंपळे यांनी प्रशासनासोबत तातडीने आढावा बैठक घेतली. संभाव्य पाणीटंचाईचा प्रश्न गांभीर्याने घेत प्रशासनाने आतापासूनच पर्यायी उपाययोजनांचे नियोजन करावे, यावर बैठकीत चर्चा करण्यात आली.
महान धरणातील पाणीसाठा सध्या केवळ २० टक्क्यांवर आला आहे. उपलब्ध पाणीसाठा अकोला शहराच्या पाणीपुरवठ्यासाठी राखीव ठेवण्याची परिस्थिती निर्माण झाल्याने मुर्तिजापूर तसेच बार्शिटाकळी तालुक्यातील नागरिकांसाठी पर्यायी पाण्याचे स्रोत उपलब्ध करून देणे आवश्यक असल्याचे बैठकीत स्पष्ट करण्यात आले.
या पार्श्वभूमीवर आमदार हरीषभाऊ पिंपळे यांनी संबंधित प्रशासकीय अधिकाऱ्यांकडून सद्यस्थितीचा आढावा घेतला. पाणीटंचाई निर्माण झाल्यानंतर उपाययोजना करण्याऐवजी संभाव्य परिस्थितीचा अंदाज घेऊन आधीच पर्यायी पाण्याची व्यवस्था करण्यावर भर देण्याची गरज व्यक्त करण्यात आली.
बैठकीला मुर्तिजापूरचे उपविभागीय अधिकारी श्री. संदीपकुमार अपारसाहेब, तहसीलदार श्रीमती शिल्पाताई बोबडे, नगराध्यक्ष हर्षल साबळे, नगरपरिषदेचे मुख्याधिकारी श्री. निलेश जाधव, नगर अभियंता, बार्शिटाकळीचे तहसीलदार तसेच संबंधित विभागातील अधिकारी उपस्थित होते.
पर्यायी पाणीस्रोतांवर चर्चा
महान धरणातील पाणीसाठा कमी होत असल्याने मुर्तिजापूर व बार्शिटाकळी तालुक्यांसाठी पर्यायी पाणीस्रोतांचा शोध घेण्यावर बैठकीत विशेष चर्चा करण्यात आली. मंगरूळ कांबे, दगडपारवा तसेच घुमशी-मुंगशी परिसरात उपलब्ध असलेल्या अतिरिक्त पाण्याचा वापर करून ते पाणी गरजू भागांपर्यंत पोहोचविता येईल का, याबाबत प्रशासनाच्या माध्यमातून आवश्यक तांत्रिक व प्रशासकीय बाबी तपासण्याबाबत चर्चा झाली.
उपलब्ध पाण्याचा योग्य पद्धतीने वापर, पाणीपुरवठ्याच्या पर्यायी योजना, संबंधित भागांची गरज, पाणी वाहून नेण्यासाठी आवश्यक असलेली यंत्रणा आणि प्रशासनाच्या पातळीवर करावयाच्या उपाययोजनांचा आढावा घेण्यात आला.
पाणीटंचाई टाळण्यासाठी नियोजनाची गरज
पावसाळ्यानंतर धरणातील पाणीसाठा झपाट्याने कमी होत असल्यास आगामी काळात ग्रामीण भागासह शहरातील नागरिकांनाही पाणीटंचाईचा सामना करावा लागू शकतो. त्यामुळे उपलब्ध जलस्रोतांचे नियोजनबद्ध व्यवस्थापन करण्याबरोबरच संभाव्य टंचाईग्रस्त भागांची माहिती घेऊन त्यानुसार उपाययोजना आखणे आवश्यक आहे.
मुर्तिजापूर व बार्शिटाकळी तालुक्यातील नागरिकांना भविष्यात पाण्यासाठी भटकंती करण्याची वेळ येऊ नये, यासाठी प्रशासनाने सर्व उपलब्ध पर्यायांचा गांभीर्याने विचार करून आवश्यक ती कार्यवाही करावी, अशी भूमिका या बैठकीत मांडण्यात आली.
प्रशासनाने सतर्क राहण्याच्या सूचना
महान धरणातील पाणीसाठ्याची सद्यस्थिती लक्षात घेता प्रशासनाने पाणीपुरवठ्याच्या परिस्थितीवर सातत्याने लक्ष ठेवणे आवश्यक असल्याचे बैठकीत अधोरेखित करण्यात आले. उपलब्ध पाणीसाठ्याचा काटकसरीने वापर करण्यासोबतच भविष्यातील गरज लक्षात घेऊन पर्यायी जलस्रोतांची उपलब्धता तपासणे, त्यांची क्षमता आणि वापराची शक्यता याबाबत आवश्यक नियोजन करण्याची गरज व्यक्त करण्यात आली.
दरम्यान, मुर्तिजापूर, बार्शिटाकळी तसेच अकोला तालुक्यातील गरजू भागांना उपलब्ध पर्यायी जलस्रोतांमधून पाणी उपलब्ध करून देता येईल का, यासाठी संबंधित यंत्रणांनी प्रत्यक्ष पाहणी व तांत्रिक बाबींचा अभ्यास करणे महत्त्वाचे ठरणार आहे.
महान धरणातील पाणीसाठा कमी झाल्याच्या पार्श्वभूमीवर संभाव्य पाणीटंचाईचे संकट निर्माण होण्यापूर्वीच प्रशासनाला सोबत घेऊन आढावा बैठक घेण्यात आल्याने आता पर्यायी पाणीस्रोतांच्या उपलब्धतेबाबत प्रशासन कोणती कार्यवाही करते, याकडे मुर्तिजापूर व बार्शिटाकळी तालुक्यातील नागरिकांचे लक्ष लागले आहे.
