टेंभुर्णीत रोटरी क्लबचा शैक्षणिक क्रांतीचा उपक्रम ..
बातमी सम्राट | अमोल मदने | माढा तालुका प्रतिनिधी |दि.०४/१०/२०२६/
टेंभुर्णी येथील रयत हायस्कूलमध्ये दिनांक ३० सप्टेंबर रोजी इयत्ता दहावीच्या विद्यार्थ्यांना एज्युकेशन ॲप वाटपाचा भव्य कार्यक्रम मोठ्या उत्साहात पार पडला. रोटरी क्लब ऑफ टेंभुर्णीच्या वतीने हा स्तुत्य शैक्षणिक उपक्रम राबविण्यात आला.
दहावी हे विद्यार्थ्यांच्या आयुष्यातील महत्त्वाचे वर्ष असून, या वर्षात विद्यार्थ्यांना स्पर्धात्मक युगात टिकण्यासाठी केवळ पुस्तकी ज्ञान नव्हे तर डिजिटल शिक्षणाचीही गरज आहे. हीच गरज ओळखून रोटरी क्लबने विद्यार्थ्यांना अभ्यास अधिक सोपा, समजण्यास सोपा आणि रंजक व्हावा यासाठी हे आधुनिक एज्युकेशन ॲप मोफत उपलब्ध करून दिले आहे. या ॲपच्या माध्यमातून विद्यार्थ्यांना सर्व विषयांचे व्हिडिओ लेक्चर, प्रश्नसंच, सराव चाचण्या आणि मार्गदर्शन एका क्लिकवर मिळणार आहे.
यावेळी कार्यक्रमाचे अध्यक्ष म्हणून रोटरी क्लबचे अध्यक्ष मा. पाटील साहेब उपस्थित होते. तर प्रमुख उपस्थिती म्हणून क्लबचे संस्थापक अध्यक्ष यशवंत हांडे, रो. श्रीकांतजी लोंढे, रो. संदीप जाधव, रो. सागर शिरसागर, रो. विठ्ठल मिस्किन यांच्यासह रयत हायस्कूलचे मुख्याध्यापक, शिक्षकवृंद आणि शेकडो विद्यार्थी मोठ्या संख्येने उपस्थित होते.
आपल्या मनोगतात रोटरी क्लबच्या पदाधिकाऱ्यांनी सांगितले की, “टेंभुर्णी परिसरातील ग्रामीण भागातील विद्यार्थी हुशार आहेत, मात्र त्यांना योग्य डिजिटल साधने मिळत नाहीत. त्यामुळे आम्ही हा छोटासा प्रयत्न केला आहे. यापुढेही विद्यार्थ्यांच्या शैक्षणिक प्रगतीसाठी रोटरी क्लब सदैव तत्पर राहील.”
या उपक्रमामुळे विद्यार्थ्यांमध्ये आनंदाचे वातावरण असून पालक वर्गातूनही रोटरी क्लबच्या या कार्याचे विशेष कौतुक होत आहे. कार्यक्रमाचे सूत्रसंचालन व आभार प्रदर्शन शाळेच्या वतीने करण्यात आले.
—
