किनवट शहरात मोकाट व हिंसक कुत्र्यांचा बंदोबस्त करण्याची मागणी – नगरसेवक संतोष मरसकोल्हे
प्रतिनिधी : मार्कंडेय सिरमवार
किनवट : शहरातील विविध भागांत मोकाट व हिंसक कुत्र्यांचा वावर वाढल्याने नागरिकांमध्ये भीतीचे वातावरण निर्माण झाले आहे. विशेषतः लहान मुले, महिला, ज्येष्ठ नागरिक तसेच दुचाकीस्वारांना या कुत्र्यांमुळे धोका निर्माण होत असल्याने तातडीने उपाययोजना करण्याची मागणी नागरिकांकडून होत आहे.
शहरातील गल्ली-बोळ, बाजारपेठ, शाळा परिसर तसेच मुख्य रस्त्यांवर मोकाट कुत्र्यांचे टोळके फिरताना दिसून येत आहे. रात्रीच्या वेळी या कुत्र्यांचा त्रास अधिक वाढत असून, वाहनांचा पाठलाग केल्यामुळे अपघाताची शक्यताही निर्माण झाली आहे. काही ठिकाणी कुत्रे नागरिकांच्या अंगावर धावून येत असल्याने नागरिकांना जीव मुठीत धरून मार्गक्रमण करावे लागत आहे.
या गंभीर समस्येकडे किनवट नगरपरिषदेने तातडीने लक्ष देऊन मोकाट कुत्र्यांचे सर्वेक्षण करावे, त्यांचे निर्बीजीकरण व लसीकरण करावे तसेच नागरिकांना त्रास देणाऱ्या आक्रमक कुत्र्यांबाबत नियमानुसार आवश्यक कारवाई करावी, अशी मागणी होत आहे. महाराष्ट्र शासनाच्या नगरपरिषद प्रशासनाच्या नोंदीनुसार किनवट नगरपरिषद नांदेड जिल्ह्यातील क वर्ग नगरपरिषद आहे.
नागरिकांच्या सुरक्षिततेला प्राधान्य देत नगरपरिषदेने विशेष पथक नियुक्त करून तक्रारींची तातडीने दखल घ्यावी. तसेच कुत्र्यांची संख्या वाढण्यामागील कारणांवर उपाययोजना करून शहर स्वच्छ ठेवण्यासाठी नागरिकांनीही कचरा उघड्यावर न टाकण्याचे आवाहन करण्यात यावे.
मोकाट व हिंसक कुत्र्यांचा तातडीने बंदोबस्त करून नागरिकांना सुरक्षित वातावरण उपलब्ध करून द्यावे, अशी जोरदार मागणी प्रभाग क्रमांक १ नगरसेवक संतोष मरसकोल्हे व किनवटकरांकडून होत आहे.
