राखी बांधून भगिनींनी दिले स्नेहाचे बंधन; भीमराव धोंडेंनी दिला आरोग्याचा संदेश
बाबाजी महाविद्यालयाच्या परिसरात राखी पौर्णिमेचे औचित्य; नियमित व्यायाम, पायी फिरणे आणि सकस आहाराचा नागरिकांना सल्ला
प्रतिनिधी : दिगंबर बोडखे
आष्टी – आनंदराव धोंडे उर्फ बाबाजी महाविद्यालयाच्या परिसरात सकाळी पायी फिरण्यासाठी आलेले माजी आ. भीमराव धोंडे यांना विद्यार्थिनी व महिलांनी राखी पौर्णिमेचे औचित्य साधून राखी बांधली. या स्नेहपूर्ण प्रसंगानंतर धोंडे यांनी उपस्थित विद्यार्थिनी, महिला व नागरिकांशी संवाद साधत निरोगी जीवनशैलीचे महत्त्व सांगितले. माजी आ. भीमराव धोंडे हे दररोज सकाळी महाविद्यालय परिसरात पायी फिरण्यासाठी तसेच व्यायाम करण्यासाठी येत असतात. आजही त्यांनी नेहमीप्रमाणे कडा येथील आनंदराव धोंडे महाविद्यालयाचे परिसरात फेरफटका मारून व्यायाम केला. व्यायाम झाल्यानंतर महाविद्यालयातील विद्यार्थिनी व उपस्थित महिलांनी त्यांना राखी बांधण्याचा आग्रह केला. धोंडे यांनीही हा स्नेह स्वीकारत सर्वांना शुभेच्छा दिल्या.
या प्रसंगाचे औचित्य साधून त्यांनी उपस्थित नागरिकांना आरोग्याची काळजी घेण्याचे आवाहन केले. बदलती जीवनशैली, वाढता ताण आणि दैनंदिन धावपळ यामुळे आरोग्याकडे दुर्लक्ष होत आहे. त्यामुळे प्रत्येकाने आपल्या दैनंदिन दिनचर्येत नियमित व्यायाम, पायी फिरणे आणि योग्य आहाराला महत्त्व द्यावे, असे त्यांनी सांगितले.
आरोग्य चांगले ठेवण्यासाठी महागड्या साधनांची गरज नसून नियमित चालणे, व्यायाम करणे आणि सकस आहार घेणे या साध्या सवयीही प्रभावी ठरतात, असे धोंडे यांनी स्पष्ट केले. विद्यार्थ्यांनी अभ्यासासोबतच शारीरिक आरोग्याकडेही लक्ष द्यावे, असा सल्ला त्यांनी दिला. राखी पौर्णिमेनिमित्त विद्यार्थिनी व महिलांनी व्यक्त केलेला स्नेह आणि त्यातून दिलेला आरोग्याचा संदेश यामुळे बाबाजी महाविद्यालय परिसरातील हा प्रसंग विशेष ठरला. याप्रसंगी बबलू शेठ तांबोळी, तळेकर आप्पा, वेदपाठक, माजी सरपंच केशव चव्हाण, पत्रकार राजेंद्र जैन, भादवे, बाळासाहेब ढोबळे, योगाचार्य महेश जाधव, प्राचार्य डॉ. हरिदास विधाते. राजू रासकर, प्रा. जमीर शेख, ज्ञानेश्वर चौधरी, प्रा. पांडू अनारसे, प्रा. मुस्ताक पानसरे,प्रा. राजू पाचे, प्रा. ढोबळे विनोद, प्रा. सुकुमार परकाळे यांच्यासह महाविद्यालयात सकाळी व्यायाम करण्यासाठी आलेले ग्रामस्थ आणि महिला मोठ्या संख्येने उपस्थित होते.
